Publications

Rezultadu Asesmentu Rápidu

Impaktu Covid-19 ba Situasaun Ekonomia no Sosiál Komunidade Rural

Introdusaun

Pandemia Covid-19 sai ona ameasa ne’ebé sériu ba ema nia vida moris iha mundu tomak, kuaze ema tokon 10 liu mak hetan ona tranzmisaun husi moras ida ne’e no hamate ona ema liu 450,000. No moras refere, tuir predisaun husi Organizasaun Saúde Mundial  sei nafatin aumenta númeru infeksaun iha future oin tanba seidauk iha vasina hodi kombate.

Iha periodu fulan 7 nia laran husi pandemia Covid-19, nasaun dezenvolvidu sira iha kontinente Europea, America, Asia, Afrika no Illa Pasífiku sira, hetan resesaun iha setór oi-oin hanesan ekonomia, agrikultura, transportasaun, turizmu no seluk tan. Situasaun ekonomia iha mundu monu besik porsentu 5% (Predisaun IMF).Nune’e mós  afeta ba produsaun agrikultura, tuir FAO nia predisaun  iha periodu Covid-19 produsaun ai-han sei monu no FAO alerta ba mundu kona-ba ameasa husi hamlaha. Husi resesaun ne’e mós  lori Impaktu negativu ba traballadór iha nasaun barak mak lakon servisu no lakon oportunidade atu hetan asesu ba fasilidade públiku sira.

Infeksaun pandemia Covid-19 ne’e, fo mós ameasa ba Timor Leste hanesan ho nasaun sira seluk ne’ebé konsege hetan infeksaun hamutuk ema na’in 24. Maske nune’e, ho asaun prevensaun ne’ebé lais no rigorozu ho medida Estadu Emerjénsia ne’ebé Estadu Timor Leste foti, lori nasaun ne’e livre ona husi Covid-19 no la iha rezultadu ema mate tanba moras refere.

Maske Timor Leste livre ona, maibé  implikasaun husi pandemia Covid-19 ba populasaun nia vida moris sei eziste, tanba iha periodu Estadu Emerjénsia durante fulan 3 setór produtivu sira paradu no menus sirkulasaun ekonomia ne’ebé afeta ba komunidade sira liu-liu ba to’os na’in sira menus produsaun no lakon rendimentu tanba la halo distribuisaun ba merkadu no ema ka grupu sira ne’ebé servisu iha setór ekonomia informal hanesan negosiante ki’ik sira iha merkadu lakon rendimentu 80%, negosiante ambulante lakon rendimentu 90% no kios ki’ik lakon rendimentu 48% inklui transporte públiku sira lakon rendimentu 95% (rezultadu rapid esesment husi MDI).

Ho resesaun ne’ebé akontese iha mundu tomak no situasaun ekonomia rai laran ne’ebé monu, presiza iha mekanizmu hodi halo rekoperasaun liu-liu ba setór sira ne’ebé hetan afeta hanesan Agrikultura no ekonomia, atu nune’e bele normaliza hikas atividade produtivu sira iha nivel Komunidade no bele hadi’a populasaun hotu nia rezilensia ba moris iha futuru oin.

Nune’e ekipa implementador programa TAPSA nian formula pakote ki’ik ba rekoperasaun, liu husi verifika dadus no informasaun husi komunidade sira iha area tarjetu ne’ebé identifikadu hodi buka hatene dezafiu no obstákulu husi komunidade nomós identifika nesesidade ne’ebé ekipa TAPSA bele responde.

Objetivu

1. Atu buka hatene dezafiu no difikuldade husi komunidade to’os na’in sira, durante aplikasaun Estadu Emerjénsia hodi halo produsaun.
2. Atu foti baze de dadus ne’ebé viable ba ekipa TAPSA nian hodi utiliza nu’udar referénsia ba medida intervensaun impaktu Estadu Emerjénsia iha kampu

 Métodu Asesmentu, Amostra no Durasaun

1. Métodu no instrumentu ne’ebé atuál uza hodi elabora relatóriu ida ne’e inklui:

• Tempu: fó informasaun kona-ba durasaun no kategoria respondente nomós tipu informasaun ne’ebé koleta.
• Open Data Kit Survey: Instrumentu ne’ebé utiliza hodi halo kolesaun dadus ho tablet/smart phone.
• Analisa dadus: ferramenta ne’ebé utiliza hodi analiza dadus mak SSPS no Excel sheet.

2. Amostra no Durasaun:

• Tarjetu amostra ne’ebé foti iha asesmentu rápidu mai husi produtór, negosiante no konsumidór hamutuk ema 92 kompostu husi mane 42 feto 50
• Area tarjetu asesmentu rápidu mak hanesan iha suku 26 ne’ebé pertense ba munisipiu haat hanesan: Munisipiu Liquisa iha Suku Guisu, Lissadila,Vatuboro, Dato, Maumeta, Ulmera,no Lihu. Munisipiu Aileu iha suku Aisirimou, Seloi, Seloi kraik, Tohu Meta. Munisipiu Ermera Suku Guololo, Atudara, Fatuquero, Lauala, no Talimoro. Munisipiu Dili iha suku Comoro, Moris dame, Loskabubu, Becora, Camea, Inur Fuik, 20 de Maio, Nazare, Santa Cruz no Culuhun.
• Total durasaun ba asesmentu rápidu loron haat iha 13-19 Maiu 2020.