HAK Lansa Boletín TAPSA, Manuel: Ai-Han Mak Direitus Fundamentu Sidadaun nian

Asosiasaun HAK lansa Boletín Lian Agrikultura ho títulu Tranzisaun Agroekolójia Ba Soberania Ai-Han [TAPSA]

Liu hosi lansamentu Boletín TAPSA, Diretór Asosiasaun HAK Manuel Monteiro hateten objetivu hosi lansamentu livru ne’e, hodi fahe rezultadu monitorizasaun situasaun direitus umanus tuir deskobrimentu HAK nian durante períodu 2018 iha Munisipiu Ainaro, Aileu, Baucau, Dili, Ermera n Viqueqeu, ba komunidade sira no Instituisaun relevante sira.

Objetivu seluk katak atu halo kompañia no advokasia ba Instituisaun Estadu relevante sira ho nia finalidade hodi hadi’ak liután, situasaun direitu umanu iha Timor-Leste.

“Direitu Ekonomia Sosiál kulturál mak ami foti agrikultura, edukasaun, saúde, asuntu bee moos no asuntu rai. Ita hare katak ita nia problema ai-han ne’e problema boot ba ita nia nasaun. Ai-han sai hanesan direitus fundamentu sidadaun nian, tanba ne’e estadu iha obrigasaun atu responde sidadaun sira nia direitu. Oinsá mak ita bele hatene katak estadu kumpre sira nia obrigasaun, primeiru hare hosi polítika ministériu relevante sira ne’e polítika iha ka lae, atu garante sidadaun sira nia direitu fundamentu sira, iha ka lae alokasaun fundu orsamentu jerál estadu nian, ne’e garante ka lae polítika ne’e”, hateten Manuel Monteiro, iha aula HAK 02/08.

Tuir relatóriu ne’ebé HAK aprezenta esplika katak, Ai-han nu’udar komponente ida ne’ebé labele hasai ka hadook hosi ema nia moris, tanba ne’e ai-han nu’udar direitu fundamentu, ne’ebé Estadu parte sira Konvensaun Internasional Direitu Ekonomia, Sosiál no Kultura, iha obrigasaun hodi kria kondisaun, atu nune’e ninia sidadaun sira iha vontade hodi hala’o vida agríkola, hodi nune’e bele prodús ai-han ne’ebé sufisiente ba sira ninia nesesidade konsume no distribuisaun ba merkadu lokál, hodi hatán ba sira nia nesesidade báziku sira.

HAK ne’ebé ho ninia vizaun no misaun hodi defende vítima violasaun direitus umanus, hakbiit kapasidade komunidade, liu hosi transferénsia matenek, dezenvolve povu nia kualidade moris, dezenvolve koñesimentu lokál no partisipa iha dezenvolvimentu no kontrola sosiál, deklara katak agrikultura sai hanesan fatór prinsipál, hodi determina povu Timor-Leste nia moris.

Produsaun Ai-Han

Tuir dadus estatístika agrikultura nian hosi governu Timor-Leste nia situasaun produsaun ai-han, sei nafatin laiha progresu boot hafoin liu tiha tinan 16, maske governu no ajénsia dezenvolvimentu sira gasta ona osan barak ba setór agrikultura, maibé nafatin hatudu katak produsaun agrikultura kontinua tun.

Alokasaun Orsamentu Jerál Estadu [OJE] ba setór agrikultura no peska iha tinan 2015 tokon $34.457, iha 2016 tun ba tokon $24.862, iha 2017 tun ba tokon $21.962 no iha 2018, tun ba $14.679.
Liga ho alokasaun orsamentu ba agrikultura no peska, Asosiasaun HAK hateten katak ne’e sai preokupasaun boot ho tendénsia ida ne’ebé reflete prioridade sira haktuir ona iha Planu Estratéjiku Dezenvolvimentu Nasionál [PEDN] 2011-2030.

“Ita nia merkadu sira nafatin domina hosi ai-han importadu, no mal-nutrisaun kontinua sai problema boot. Situasaun ne’e ita bele hare hosi dadus ne’ebé hetan durante peskiza, hatudu katak númeru konsume boot liu númeru produsaun”, rezultadu peskiza hosi Asosiasaun HAK

Tinan 2007 Timor-Leste nia produsaun hare hamutuk 60.424 ton, iha tinan 2015 produsaun foos hamutuk 60.361 ton, iha tinan 2017, produsaun tun maka’as ba 37.000 ton, no iha previzaun katak sei tun ba 30.000, iha tinan 2018 tuir dokumentu MAP nian kona-ba seguransa ai-han no nutrisaun 2017 hatudu katak Timor importa mais ou menus 40% hosi sereál sira [foos no batar] ne’ebé komunidade konsume.

Iha relatóriu peskiza alende mensiona kona-ba produsaun ai-han, sita mós kona-ba produsaun Fini, kondisaun Tratór sira no kondisaun irrigasaun.

Lansamentu Boletín TAPSA hosi HAK realiza tanba hetan apoiu husi CCFD-Terre Solidaire, AFD no Unidade Apoia Sosiedade Civil, Gabinete do Primeiru Ministru. Lansamentu ne’e hala’o iha Aula Asosiasaun HAK, iha loron 2 Agostu 2019, ne’ebé hetan partisipasaun hosi PDHJ, membru HASATIL, governu no academia hosi Universidade Timor Lorosa’e.


Print