Persentajen Malnutrisaun Iha TL Sei Aas, Ego: Tenke Esforsu an hodi Asegura Ai-han Iha Rai Laran

“Polítika orsamentál governu Timor-Leste nian la buka atu responde ba situasaun difisil iha setór agrikultura. Investimentu estadu nian ba setór agrikultura tun ba beibeik”. HASATIL

Hametin Agrikultura Sustentavel Timor-Leste [HASATIL] komemorasaun loron mundiál ai-han, ho tema Promove Ai-han Lokál Nutritivu hodi Hakotu Hamlaha no Mal-nutrisaun iha Timor-Leste.

Liu hosi komemorasaun refere, Diretór PERMATIL, Ego Lemos hato’o diskursu katak promove no hasa’e seguransa ai-han iha Timor-Leste importante tebes, atu garante ema hotu bele asesu hahán no iha nia nutrisaun ne’ebé diak ba ema hotu nia saúde.

Ativista ba agrikultura ne’e hateten katak Timor-Leste nasaun foun, hetan influénsia barak hosi ajénsia internasional no nasaun boot sira, maibé governu iha hanoin diak hodi promove agrikultura sustentavel, ida ne’e pasu diak ida ne’ebé ita tenke kontinua hamutuk.

“ne’e sinál diak ba Timor, labele para no kontinua fo hanoin ba governu atu respeita matenek lokál sira nia pratika ne’ebé halo ona no kontinua promove ai-han iha rai laran”, hateten Ego iha sede HASATIL Farol.

Ego hatutan katak ko’alia kona-ba seguransa ai-han la’ós ko’alia de’it kona-ba foos, maibé ko’alia ai-han sira seluk hanesan fehuk, batar, ai-farina, talas no seluk tan, “ita tenke hahú eduka ita nia povu no jerasaun foun oinsá han ai-han oin-oin hanesan fehuk, batar, ai-farina. Ita tenke esforsu an hodi asegura ai-han iha rai laran.

Iha fatin hanesan Diretór Jerál Sentru Lojistiku Nasionál [CLN], Agusto Junior hateten katak iha fatór importante ne’ebé presiza hatene liga ho seguransa ai-han mak hanesan stock [ketersediaan. Red] iha ka lae, oinsá nia distribuisaun ba ema hotu hodi bele asesu ka consume ai-han, oinsá ho konsumidór sira, saida mak sira han loron-loron no ikus liu kona-ba estabilidade ai-han, bele garante ai-han ne’e bele fornese to tempu naruk ka lae?

Diretór Agusto informa mós katak CLN halo esforsu hodi deteta ho didi’ak ba ai-han prinsipál [main food. Red] iha Timor, tanba tuir rezultadu peskiza hatudu katak kada tinan Timor presiza hahán prinsipál 14000 ton no kada tinan Timor prodús de’it hahán 3815 ton. Sei halo mós peskiza kona-ba persentajen hira komunidade iha Timor laran toma han ka consume batar kada tinan.

Iha problema no risku boot ne’ebé akontese iha global liga ho asuntu agrikultura, liu hosi eventu loron mundiál ai-han, Diretor Agusto informa katak, problema no ameasa ne’ebé hasoru mak hanesan degradasaun rai [degradasi lahan. Red], peste ne’ebé bele estraga ai-han sira ne’ebé kuda, krize bee global no hadau malu rai.

Agusto husu ba HASATIL atu kontinua servisu maka’as hodi halo kampaña kona ba agrikultura sustentavel no mós halo kampaña boot kona-ba fila fali ba toos.

Iha fatin hanesan liu hosi konferénsia da imprensa ne’ebé organiza hosi HASATIL, portavós HASATIL, Mariano Fereira ba jornalista sira katak HASATIL bolu governu, Parlamentu Nasionál, Prezidente Repúblika no públiku tomak nia atensaun ba situasaun real iha Timor-Leste liga ba produsaun ai-han iha rai laran no dependénsia ba importasaun ai-han hosi rai li’ur.

Timor-Leste nia situasaun produsaun ai-han sei nafatin laiha progresu boot, hafoin liu tiha tinan 15, maske governu Timor-Leste no ajénsia dezenvolvimentu sira gasta ona osan barak ba setór ne’e. Tuir dadus estatístika agrikultura nian hosi governu hatudu katak produsaun agrikultura kontinua tun.

“Ita nia merkadu sira nafatin domina hosi ai-han importadu no malnutrisaun kontinua sai problema boot. Produsaun foos kontinua tun maske durante ne’e governu tau atensaun boot liu ba parte ne’e, liu hosi investimentu maka’as ba iha irrigasaun eskala boot hodi fornese bee ba natar sira no mós distribui tratór 4000 resin ba agrikultór sira. Governu rasik rekoñese ona katak ho kondisaun ne’e Timor-Leste sei susar atu atinje tarjetu autosufsiente ai-han iha tinan 2030”, hateten Mariona Fereira, 15/10.

Portavós HASATIL mós deklara katak polítika orsamentál governu Timor-Leste nian la buka atu responde ba situasaun difisil iha setór agrikultura. Investimentu estadu nian ba setór agrikultura tun ba beibeik. Alokasaun Orsamentu Jerál Estadu [OJE] tinan 2015 aloka orsamentu tokon $34.457, iha 2016 tun ba tokon $24.826, iha 2017 tun ba tokon $21.926 no iha 2018 tun ba tokon $14.679.

Tuir dadus MAP & FAO hatudu katak iha tinan 2007 Timor-Leste nia produsaun hare hamutuk 60.424 ton, iha flutuasaun durante periodu 2008-2014. Iha tinan 2015 produsaun foos total hamutuk 60.361ton. Tinan kotuk 2017, produsaun tun maka’as ba 37.000 ton no iha previzaun katak sei tun liu tan ba 30.000 ton.

Dokumentu MAP nian kona-ba Seguransa ai-han no nutrisaun 2017 hatudu katak Timor importa mais menus 40% hosi sereál [foos no batar] ne’ebé ita consume. Malnutrisaun nafatin aas ho persentajen stunting ka ra’es 50.2%, wasting ka forsa laiha 11.0% no underweight ka krekas 37.7%.

Liu hosi loron mundiál ai-han HASATIL husu ba governu tenke fo atensaun maka’as no investe ba promove produsaun ai-han iha rai laran no promove produtu ai-han lokál, ortikultura, produtu peska no pekuaria inklui ai-han indigenous no a-han fuik sira ne’ebé eziste nanis ona iha Timor-Leste, tanba iha valor nutrisaun diak liu ba ema, saúde, ambiente no ekonomia rai laran.


Print